Plantun de Prouvènço

Pèr coumpara dos planto d'encò nostre

Salix caprea & Euonymus europaeus

Amarinas

Salix caprea

Salicaceae

Àutri noum : Gourret, Gourrié, Gourro.

Noms en français : Saule marsault, Saule des chèvres.

Descripcioun :
L'amarinas es un aubret o un pichot aubre (fin qu'à 8 m d'aut) gaire coumun au nostre aleva au levant de Prouvènço. Se recounèis à si fueio larjo, verdo dessubre e pelouso, blanco, dessouto. Quouro es un aubret se pòu engana emé l'orle, Salix cinerea mai pèr aquéu si fueio soun larjo vers lou bout alor que pèr l'amarinas, lou mai larg s'atrobo au mitan. En mai d'acò l'orle èi pelut sus li ramo. Coumpara emé l'orle.

Usanço :
Lou bos, dur, servié pèr la fabricacioun d'óutis pèr lou travai di champ : dènt de rastèu, palissoun, poustèu... Tóuti li rusco de sause caupon de salicino que douno d'acide salicilì dins lou cors, ço qu'ajudo à abeissa li fèbre.

Port : Aubre
Taio : 1,5 à 8 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Salix
Famiho : Salicaceae

Ordre : Malpighiales

Coulour de la flour : Jauno
Petalo : ges
Ø (o loungour) enflourejado : 4 à 5 cm
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Ribiero - Bos umide
Estànci : Mesoumediterran à Mountagnard
Couroulougi : Éurasiatico
Ref. sc. : Salix caprea L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.